ആലപ്പുഴ: ലോക്സഭാ തെരഞ്ഞെടുപ്പില്‍ കന്നിവോട്ട് ചെയ്യുന്നവര്‍ക്കായി സെല്‍ഫി മത്സരം. തെരഞ്ഞെടുപ്പ് പ്രചാരണവിഭാഗമായ ആലപ്പുഴ സ്വീപ്പിന്‍റെ ആഭിമുഖ്യത്തിലാണ് മത്സരം. 2021-ലെ നിയമസഭാ തെരഞ്ഞെടുപ്പിനുശേഷം വോട്ടര്‍പട്ടികയില്‍ പേര് ഉള്‍പ്പെടുത്തിയവര്‍ക്ക് മത്സരത്തില്‍ പങ്കെടുക്കാവുന്നതാണ്.
21 വയസില്‍ താഴെയുള്ളവര്‍ ആയിരിക്കണം. വോട്ട് രേഖപ്പെടുത്തിയതിനുശേഷം പോളിംഗ് ബൂത്ത് പരിധിയില്‍വച്ചാണ് സെല്‍ഫി എടുക്കേണ്ടത്. ചൂണ്ടുവിരലിലെ മഷി അടയാളം ഉള്‍പ്പെടെയുള്ള സെല്‍ഫിയാണ് മത്സരത്തിനു പരിഗണിക്കുന്നത്.സെല്‍ഫി ഫോട്ടോ വോട്ടര്‍മാരുടെ ഫേസ് ബുക്ക് അക്കൗണ്ടില്‍ #election2024_sveepalappuzha ഹാഷ് ടാഗില്‍ പോസ്റ്റ് ചെയ്യണം. 26 രാവിലെ ഏഴുമുതല്‍ വൈകുന്നേരം ഏഴുവരെയാണ് മത്സര സമയം. തെരഞ്ഞെടുക്കപ്പെടുന്ന 20 സെല്‍ഫികള്‍ക്ക് ജില്ലാ തെരഞ്ഞെടുപ്പ് വിഭാഗം ഒരുക്കുന്ന സൗജന്യഹൗസ് ബോട്ട് യാത്രയാണ് സമ്മാനം.
