കാഞ്ഞിരപ്പള്ളി:വോട്ട് നല്കിയില്ലെങ്കിലും മകനായ അനിലിനെ അനുഗ്രഹിക്കണമെന്ന് എ.കെ. ആന്റണിയോട് കേന്ദ്ര പ്രതിരോധമന്ത്രി രാജ്നാഥ് സിംഗ്. അനില് ആന്റണി ജയിക്കില്ലെന്ന ആന്റണിയുടെ പ്രസ്താവന തന്നെ അത്ഭുതപ്പെടുത്തി. കോണ്ഗ്രസ് പാര്ട്ടിയുടെ സമ്മര്ദം കാരണമാകാം ആന്റണി അത്തരത്തിൽ പ്രതികരിച്ചതെന്ന് അദ്ദേഹം പറഞ്ഞു.
കാഞ്ഞിരപ്പള്ളിയില് പത്തനംതിട്ടയിലെ എൻഡിഎ സ്ഥാനാർഥി അനില് ആന്റണിയുടെ തെരഞ്ഞെടുപ്പ് പ്രചാരണത്തില് സംസാരിക്കുകയായിരുന്നു അദ്ദേഹം.
ആന്റണി തനിക്ക് ജ്യേഷ്ഠസഹോദരനെ പോലെയാണ്. താന് ആന്റണിയോട് പറയുന്നത് അദ്ദേഹത്തിന്റെ മകനാണ് അനില്. അതിനാല് അനിലിന് വോട്ട് നല്കിയില്ലെങ്കിലും അനുഗ്രഹം നല്കണം എന്നാണ്. അനിലിന് ബിജെപിയില് വലിയ ഭാവിയുണ്ടെന്നും രാജ്നാഥ് സിംഗ് കൂട്ടിച്ചേർത്തു.പ്രതിരോധ മന്ത്രിയായിരുന്ന ആന്റണിയുടെ സത്യസന്ധതയില് തനിക്ക് ഒരു സംശയവും ഇല്ല. അദ്ദേഹത്തിനു നേരേ ഒരു ആരോപണവും ഉയര്ന്നിട്ടില്ല. എന്നാല് കോണ്ഗ്രസിന്റെ നിരവധി മന്ത്രിമാര് അഴിമതിക്കേസുകളില് ജയിലില് പോയിട്ടുണ്ട്.
ചന്ദ്രയാന് ദൗത്യം വിജയിച്ചു. പക്ഷേ കോണ്ഗ്രസിന്റെ രാഹുല്യാന് ദൗത്യം കഴിഞ്ഞ 20 വര്ഷമായിട്ടും എങ്ങും എത്തിയിട്ടില്ലെന്നും രാജ്നാഥ് സിംഗ് പരിഹസിച്ചു. കേരളത്തില് എന്ഡിഎ രണ്ടക്കം കടക്കുമെന്നും അദ്ദേഹം അവകാശപ്പെട്ടു.