കൊച്ചി: ഹൈക്കോടതി ജഡ്ജി സതീഷ് നൈനാന്‍റെ ഡ്രൈവറായിരുന്ന മുല്ലശേരി കനാല്‍ റോഡ് സ്വദേശി വിനോദ് ആണ് മരിച്ചത്.വളര്‍ത്തുനായയെ ആക്രമിച്ചത് ചോദ്യം ചെയ്തതിനാണ് വിനോദിനെ ഇതര സംസ്ഥാന തൊഴിലാളികള്‍ ആക്രമിച്ചത്. കഴിഞ്ഞ ആഴ്ചയാണ് സംഭവം.വിനോദിന്‍റെ വീടിന് മുന്നിലൂടെ നാലംഗ സംഘം കടന്നുപോയപ്പോള്‍ നായ കുരച്ച് ബഹളമുണ്ടാക്കി. ഇത് കണ്ട് പ്രകോപിതരായി ഇവര്‍ നായയെ ആക്രമിക്കാന്‍ ശ്രമിച്ചു.
വിനോദ് ഇത് ചോദ്യം ചെയ്തതോടെ നാലുപേരും ചേര്‍ന്ന് ആക്രമിക്കുകയായിരുന്നു. കഴുത്തിന് കുത്തിപ്പിടിച്ച് ഉയര്‍ത്തിനിര്‍ത്തിയതോടെ വിനോദിന് ശ്വാസതടസം ഉണ്ടായി. പിന്നീട് ആശുപത്രിയില്‍ എത്തിച്ചെങ്കിലും വെന്‍റിലേറ്ററില്‍ ചികിത്സയിലിരിക്കെ ഇന്ന് രാവിലെ മസ്തിഷ്ക മരണം സംഭവിക്കുകയായിരുന്നു.അതേസമയം വിനോദിനെ ആക്രമിച്ച നാല് പേരെയും പോലീസ് നേരത്തേ അറസ്റ്റ് ചെയ്തിരുന്നു. ഇവര്‍ക്കെതിരേ കൊലക്കുറ്റം അടക്കം ചുമത്തുമെന്ന് പോലീസ് അറിയിച്ചു.
