തിരുവനന്തപുരം: ലോക്സഭാ തെരഞ്ഞെടുപ്പ് വിജ്ഞാപനം ഇന്നു നിലവിൽ വരുന്നതോടെ ഇന്നു മുതൽ നാമനിർദേശ പത്രിക സമർപ്പിക്കാം. ഏപ്രിൽ നാലു വരെ പത്രിക സമർപ്പിക്കാമെങ്കിലും അവധി ദിവസങ്ങൾ വരുന്ന സാഹചര്യത്തിൽ അഞ്ചു ദിവസം മാത്രമാണ് പത്രികാ സമർപ്പണത്തിനു ലഭിക്കുക.നിയുക്ത വരണാധികാരിയുടെയും ഉപവരണാധികാരുടെയും മുന്പാകെ അവധിദിവസങ്ങൾ ഒഴികെ രാവിലെ 11 മുതൽ ഉച്ചകഴിഞ്ഞ് മൂന്നു വരെ പത്രിക സമർപ്പിക്കാം.
ദുഃഖവെള്ളി ദിവസമായ നാളെയും 31ന് ഞായറാഴ്ചയും ബാങ്ക് വാർഷിക കണക്കെടുപ്പു ദിവസമായ ഏപ്രിൽ ഒന്നിനും പത്രിക സമർപ്പിക്കാനാകില്ല. കേന്ദ്രസർക്കാർ പ്രവൃത്തിദിനങ്ങളായ മാർച്ച് 28, 30, ഏപ്രിൽ രണ്ട്, മൂന്ന്, നാല് തീയതികളിൽ പത്രിക സമർപ്പിക്കാം.സൂക്ഷ്മ പരിശോധന ഏപ്രിൽ അഞ്ചിനു നടക്കും. പത്രിക പിൻവലിക്കാനുള്ള അവസാന തീയതി ഏപ്രിൽ എട്ട്.