തിരുവനന്തപുരം: ജെസ്‌ന തിരോധാനക്കേസ് തുടരന്വേഷണ ഹര്‍ജി തിരുവനന്തപുരം സിജെഎം കോടതി ഇന്ന് വീണ്ടും പരിഗണിക്കും. കഴിഞ്ഞദിവസം ജെസ്‌നയുടെ പിതാവ് ജെയിംസ് ജോസഫ് സീല്‍ ചെയ്ത കവറില്‍ നല്‍കിയ തെളിവുകള്‍ കോടതി സ്വീകരിച്ചിരുന്നു.
ചിത്രങ്ങള്‍ അടക്കമുള്ള തെളിവുകള്‍ കോടതി പരിശോധിച്ചു. തുടര്‍ന്ന് ഇന്ന് കേസ് ഡയറി ഹാജരാക്കാന്‍ അന്വേഷണ ഉദ്യോഗസ്ഥനോട് കോടതി ആവശ്യപ്പെട്ടിരുന്നു.
ജെസ്‌ന മരിയയെ 2018 മാര്‍ച്ച് 22നു കാണാതായ കേസില്‍ പോലീസും സിബിഐയും ഇനിയും കണ്ടെത്താത്തതും പരിഗണിക്കാത്തതുമായ സൂചനകളും തെളിവുകളുമാണ് ജെയിംസ് കോടതിയില്‍ സീല്‍ ചെയ്ത കവറില്‍ സമര്‍പ്പിച്ചത്.
പുഞ്ചവയലിലുള്ള പിതൃസഹോദരിയുടെ വീട്ടിലേക്കെന്നു പറഞ്ഞു പുറപ്പെട്ട ജെസ്‌ന അവിടെ എത്തിയിട്ടില്ലെന്നും ഒരു അജ്ഞാതസുഹൃത്തുമായുള്ള അടുപ്പമാണു മകള്‍ അപായപ്പെടാന്‍ കാരണമായതെന്നും ജെയിംസ് സംശയിക്കുന്നു.
