പാറ്റ്ന: ബിഹാറില് എന്ഡിഎ മുഖ്യമന്ത്രിയായി നിതീഷ് കുമാര് ഇന്ന് വൈകിട്ട് അഞ്ചിന് സത്യപ്രതിജ്ഞ ചെയ്ത് അധികാരമേൽക്കും. രാജ്ഭവനില് ഇതിനായുള്ള ഒരുക്കം തുടങ്ങി.
ചടങ്ങില് പങ്കെടുക്കുന്നതിനായി ബിജെപി ദേശീയ അധ്യക്ഷന് ജെ.പി.നദ്ദ ഡല്ഹിയില് നിന്നും ബിഹാറിലേക്ക് പുറപ്പെട്ടു.
കോണ്ഗ്രസിലെ ഒന്പത് എംഎല്എമാരുമായി പാര്ട്ടി നേതൃത്വത്തിന് ഫോണില് ബന്ധപ്പെടാന് കഴിയുന്നില്ല.
ആകെ 19 എംഎൽഎമാരാണ് ബിഹാറില് കോണ്ഗ്രസിനുള്ളത്. രാവിലെ 11ന് പൂര്ണിയയില് പാര്ട്ടി എംഎല്എമാരുടെ യോഗം വിളിച്ച് ചേര്ത്തിരുന്നു. ഈ സമയത്താണ് പകുതിയോളം എംഎല്എമാരെ ഫോണില് ബന്ധപ്പെടാന് കഴിയാതെ വന്നത്. ഇതേ തുടര്ന്ന് യോഗം ഉച്ചയ്ക്ക് ഒന്നിലേക്ക് മാറ്റിയിരുന്നു.
രാഹുല് ഗാന്ധി നയിക്കുന്ന ഭാരത് ജോഡോ ന്യായ് യാത്രയുടെ ഒരുക്കങ്ങള് ചര്ച്ച ചെയ്യാന് ശനിയാഴ്ച ചേര്ന്ന യോഗത്തിലും 10 എല്എമാര് മാത്രമാണ് പങ്കെടുത്തിരുന്നത്. ഇതോടെ കോണ്ഗ്രസ് എംഎല്എമാരെയും ചാക്കിട്ട് പിടിക്കാന് ബിജെപി ശ്രമിക്കുന്നതായി അഭ്യൂഹങ്ങള് ശക്തമായിരുന്നു.