മലപ്പുറം: ഉദിരംപൊയിലിലെ രണ്ട് വയസുകാരിയുടെ മരണത്തിൽ കുട്ടിയുടെ പിതാവ് മുഹമ്മദ് ഫായിസിനെ പോലീസ് കസ്റ്റഡിയിലെടുത്തു. കുട്ടിയെ കൊലപ്പെടുത്തിയതാണെന്ന ആരോപണമുയർന്ന സാഹചര്യത്തിൽ മുന്‍കരുതല്‍ നടപടിയുടെ ഭാഗമായാണ് ഇയാളെ കസ്റ്റഡിയിലെടുത്തതെന്ന് പോലീസ് അറിയിച്ചു.
നിലവില്‍ അസ്വാഭാവിക മരണത്തിനാണ് പോലീസ് കേസെടുത്തിരിക്കുന്നത്. പോസ്റ്റ്‌മോര്‍ട്ടത്തിന് ശേഷമേ മരണകാരണം വ്യക്തമാകൂ. കൊലപാതകമാണോ എന്ന് വ്യക്തത വന്ന ശേഷമേ മറ്റ് വകുപ്പുകള്‍ അടക്കം ചുമത്താനാകൂ എന്നും പോലീസ് പറഞ്ഞു.
ഉദിരംപൊയില്‍ സ്വദേശി മുഹമ്മദ് ഫായിസിന്‍റെ മകള്‍ നസ്‌റിന്‍ ഞായറാഴ്ചയാണ് മരിച്ചത്. സംഭവത്തില്‍ ഫായിസിനെതിരേ കുട്ടിയുടെ മാതാവും ബന്ധുക്കളുമാണ് പോലീസില്‍ പരാതി നല്‍കിയത്.നിലവില്‍ ഇന്‍ക്വസ്റ്റ് നടപടികള്‍ പൂര്‍ത്തിയായിട്ടുണ്ട്. ഉച്ചയ്ക്ക് ശേഷം പോസ്റ്റ്‌മോര്‍ട്ടം നടക്കും.
