പാലക്കാട്: കൊഴിഞ്ഞാമ്പാറയിൽ പ്ലാസ്റ്റിക് മാലിന്യങ്ങൾ ശേഖരിച്ചുവച്ച ഗോഡൗണിൽ തീപിടിത്തം. കൊഴിഞ്ഞാമ്പാറ പഞ്ചായത്ത് ഓഫീസിന് സമീപത്തായി ഉപയോഗ ശൂന്യമായി കിടന്നിരുന്ന ഉഴവർ ചന്ത കെട്ടിടത്തിലാണ് തീപിടുത്തമുണ്ടായത്. മാലിന്യവും കെട്ടിടവുമടക്കം കത്തിനശിച്ചു.
വെള്ളിയാഴ്ച രാത്രി ഒമ്പതോടെയാണ് തീപിടിത്തമുണ്ടായത്. പഞ്ചായത്തിലെ ഹരിത കർമസേനാംഗങ്ങൾ വീടുകളിൽനിന്ന് ശേഖരിച്ച പ്ലാസ്റ്റിക് മാലിന്യങ്ങൾ ഇവിടെ കൂട്ടിയിട്ട ശേഷമാണ് വേർതിരിച്ചിരുന്നത്. ഇത്തരത്തിൽ വേർതിരിച്ച പ്ലാസ്റ്റിക് മാലിന്യങ്ങൾ പകുതിയോളം കഴിഞ്ഞ ദിവസങ്ങളിലായി ഇവിടെനിന്നും കൊണ്ടുപോയിരുന്നു.+ചിറ്റൂർ, കഞ്ചിക്കോട്, കൊല്ലങ്കോട് ഫയർ സ്റ്റേഷനുകളിൽ നിന്നുള്ള അഗ്നിരക്ഷാസേനയെത്തിയാണ് പുലർച്ചെയോടെ തീ പൂർണമായും അണച്ചത്. തീപടർന്ന സമയത്ത് തൊഴിലാളികെളൊന്നുമില്ലാത്തതിനാൽ ആളപായമില്ല.