മൂവാറ്റുപുഴ: മൂവാറ്റുപുഴ രണ്ടാര്‍ക്കരയില്‍ പുഴയിൽ കുളിക്കാനിറങ്ങിയ മുത്തശിയും പേരക്കുട്ടിയും മുങ്ങിമരിച്ചു. കിഴക്കേക്കുടിയില്‍ ആമിന(60), പേരക്കുട്ടി ഫര്‍ഹ ഫാത്തിമ(12) എന്നിവരാണ് മരിച്ചത്.ഇവര്‍ക്കൊപ്പം ഉണ്ടായിരുന്ന ഫര്‍ഹയുടെ സഹോദരി ഹന ഫാത്തിമ(10)യെ കോലഞ്ചേരി മെഡിക്കല്‍ കോളജിലേക്ക് മാറ്റി. കുട്ടിയുടെ നില ഗുരുതരമാണെന്നാണ് വിവരം.രണ്ടാര്‍ക്കരയിലെ നെടിയന്‍കാല കടവില്‍ ഉച്ചയ്ക്ക് പന്ത്രണ്ടോടെയാണ് അപകടം. കുളിക്കാനും അലക്കാനുമായി കടവില്‍ എത്തിയതാണ് ഇവര്‍. അപകടം ഉണ്ടായത് എങ്ങനെയെന്ന് വ്യക്തമല്ല.ഇവര്‍ മുങ്ങിത്താഴുന്നത് കണ്ട് ഓടിയെത്തിയ പെയിന്‍റിംഗ് തൊഴിലാളികളാണ് ഇവരെ പുറത്തെടുത്തത്. എന്നാല്‍ ആമിനയും ഫർഹയും ആശുപത്രിയില്‍ എത്തിക്കും മുമ്പ് മരിച്ചു.
