തിരുവനന്തപുരം: കേന്ദ്ര-സംസ്ഥാന സർക്കാരുകൾക്ക് എതിരേ കോൺഗ്രസ് സംഘടിപ്പിക്കുന്ന സംസ്ഥാനതല ജാഥ സമരാഗ്നി വെള്ളിയാഴ്ച ആരംഭിക്കും. കെപിസിസി പ്രസിഡന്റ് കെ. സുധാകരനും പ്രതിപക്ഷ നേതാവ് വി.ഡി. സതീശനും ചേർന്നാണ് ജാഥ നയിക്കുന്നത്.ഉച്ചകഴിഞ്ഞു നാലിന് കാസർഗോഡ് മുനിസിപ്പൽ മൈതാനത്ത് നിന്ന് ആരംഭിക്കുന്ന പരിപാടിയുടെ ഉദ്ഘാടനം എഐസിസി ജനറൽ സെക്രട്ടറി കെ.സി. വേണുഗോപാൽ നിർവഹിക്കും. എല്ലാ ജില്ലകളിലും വ്യത്യസ്ത മേഖലകളില് കഷ്ടതകള് അനുഭവിക്കുന്ന സാധാരണക്കാരുമായി കൂടിക്കാഴ്ച നടത്തി നേതാക്കൾ അവരുടെ പ്രശ്നങ്ങള് കേള്ക്കും.കേരളത്തിന്റെ ചുമതലയുള്ള ദീപാദാസ് മുൻഷി, കോണ്ഗ്രസ് പ്രവർത്തകസമിതി അംഗങ്ങളായ രമേശ് ചെന്നിത്തല, ശശി തരൂർ എംപി, കൊടുക്കുന്നിൽ സുരേഷ് എംപി, യുഡിഎഫ് കണ്വീനർ എം.എം. ഹസൻ, കെപിസിസി പ്രചാരണ സമിതി ചെയർമാൻ കെ. മുരളീധരൻ, കെപിസിസി, ഡിസിസി ഭാരവാഹികൾ എന്നിവർ ഉദ്ഘാടന പരിപാടിയിൽ പങ്കെടുക്കും. 14 ജില്ലകളിലും പര്യടനം നടത്തുന്ന ജാഥ 29 ന് തിരുവനന്തപുരം പുത്തരിക്കണ്ടം മൈതാനത്ത് പൊതുസമ്മേളനത്തോടെ സമാപിക്കും.