കൊച്ചി: കോതമംഗലത്ത് വീട്ടമ്മയെ കൊലപ്പെടുത്തിയ സംഭവത്തില്‍ മൂന്ന് പേര്‍ നിരീക്ഷണത്തില്‍. ഇവരുടെ അയല്‍വീട്ടില്‍ താമസിക്കുന്ന ഇതരസംസ്ഥാന തൊഴിലാളികളാണ് നിരീക്ഷണത്തിലുള്ളത്.കള്ളാട് ചെങ്ങമനാട് ഏലിയാസിന്‍റെ ഭാര്യ സാറാമ്മയാണ് മരിച്ചത്. മോഷണത്തിനായി ആസൂത്രണത്തോടെയുള്ള കൊലപാതമാണെന്നാണ് പോലീസ് സംശയിക്കുന്നത്.
തിങ്കളാഴ്ച ഉച്ചയ്ക്ക് 1.30നും 3.30നും ഇടയിലാണ് കൊലപാതകം നടന്നിരിക്കുന്നത്. ഈ സമയം സാറാമ്മ വീട്ടിൽ തനിച്ചായിരുന്നു. തലയ്ക്കടിയേറ്റാണ് മരണം സംഭവിച്ചിരിക്കുന്നതെന്നാണ് പ്രാഥമിക നിഗമനം. വീട്ടമ്മ ശരീരത്തിൽ അണിഞ്ഞിരുന്ന സ്വർണാഭരണങ്ങൾ നഷ്ടപ്പെട്ടിട്ടുണ്ട്.വൈകുന്നേരം മരുമകള്‍ വീട്ടിലെത്തിയപ്പോഴാണ് ഇവരെ മരിച്ച നിലയില്‍ കണ്ടെത്തിയത്. സംഭവത്തിൽ പോലീസ് അന്വേഷണം തുടരുകയാണ്.
