കണ്ണൂര്‍: പാനൂര്‍ സ്‌ഫോടനവുമായി ബന്ധപ്പെട്ട് പ്രദേശത്ത് നടത്തിയ പരിശോധനയില്‍ 10-ല് അധികം സ്റ്റീല്‍ ബോംബുകള്‍ കണ്ടെത്തി. കുറ്റിക്കാട്ടില്‍ ഒളിപ്പിച്ച നിലയിലാണ് ബോംബുകള്‍ കണ്ടെടുത്തത്.
അറസ്റ്റിലായ ഷെബിന്‍ ലാലുമായി നടത്തിയ തെളിവെടുപ്പിലാണ് ബോംബുകള്‍ കണ്ടെത്തിയത്. തുരുമ്പിച്ച ആണി, കുപ്പില്ല്, മെറ്റല്‍ ചീളുകള്‍ എന്നിവയാണ് ബോംബ് നിര്‍മാണത്തിന് പ്രതികള്‍ ഉപയോഗിച്ചതെന്ന് അന്വേഷണസംഘം കണ്ടെത്തി.
പത്ത് പേരടങ്ങുന്ന സംഘമാണ് പാനൂരിലെ നിര്‍മാണം പൂര്‍ത്തിയാകാത്ത വീടിന് മുകളില്‍ ബോംബ് നിര്‍മാണത്തില്‍ ഏര്‍പ്പെട്ടിരുന്നത്. ഇതില്‍ ഒരാള്‍ മരിച്ചു. മൂന്ന് പേര്‍ പരിക്കേറ്റ് വിവിധ ആശുപത്രികളില്‍ ചികിത്സയിലാണ്.നാല് പേരെയാണ് പോലീസ് ഇതുവരെ പിടികൂടിയത്. കുന്നോത്തുപറമ്പിലെ സിപിഎം പ്രവര്‍ത്തകരായ അതുല്‍, അരുണ്‍, ഷബിന്‍ ലാല്‍ എന്നിവരാണ് അറസ്റ്റിലായത്. കസ്റ്റഡിയിലുള്ള മറ്റൊരാളായ സായൂജിന്‍റെ അറസ്റ്റ് രേഖപ്പെടുത്തിയിട്ടില്ല.
