ഇടുക്കി: കുമളിയില്‍ മക്കളുപേക്ഷിച്ചതിനെ തുടര്‍ന്ന് പോലീസ് ആശുപത്രിയിലാക്കിയ വയോധിക മരിച്ചു. കുമളി അട്ടപ്പള്ളം സ്വദേശി അന്നക്കുട്ടി മാത്യു ആണ് മരിച്ചത്. കോട്ടയം മെഡിക്കല്‍ കോളജില്‍ ചികിത്സയിലിരിക്കെയാണ് മരണം.വെള്ളിയാഴ്ചയാണ് കുമളി ലക്ഷംവീട് കോളനിയിലെ വീട്ടില്‍ ഒറ്റയ്ക്ക് താമസിച്ചിരുന്ന അന്നക്കുട്ടിയെ പോലീസ് ആശുപത്രിയിലേക്ക് മാറ്റിയത്. നാട്ടുകാര്‍ അറിയിച്ചതിനെ തുടര്‍ന്നാണ് പോലീസ് ഇവിടെയെത്തിയത്.
വലതുകൈ ഒടിഞ്ഞിരുന്ന ഇവര്‍ അവശനിലയിലായിരുന്നു. ഉടനെ പോലീസ് സ്വകാര്യ ആശുപത്രിയില്‍ എത്തിച്ചു. പിന്നീട് വിദഗ്ധ ചികിത്സയ്ക്കായി കോട്ടയം മെഡിക്കല്‍ കോളജിലേക്ക് മാറ്റുകയായിരുന്നു.പോലീസ് മക്കളെ വിവരം അറിയിച്ചെങ്കിലും ആരും എത്തിയിരുന്നില്ല. ഇവര്‍ക്ക് കരള്‍ രോഗം ബാധിച്ചിരുന്നെന്നാണ് സംശയം.
