തിരുവനന്തപുരം: ഡ്രൈവിംഗ് ടെസ്റ്റ് പരിഷ്കാരങ്ങള്‍ക്കെതിരേ സംസ്ഥാനത്ത് ഇന്നും പ്രതിഷേധം. തിരുവനന്തപുരം മുട്ടത്തറയില്‍ ടെസ്റ്റ് മുടങ്ങി. ഐഎന്‍ടിയുസിയും സ്വതന്ത്ര സംഘടനകളും ചേര്‍ന്ന് മുട്ടത്തറയില്‍ രാവിലെ മുതല്‍ പ്രതിഷേധം തുടരുകയാണ്.
തിങ്കളാഴ്ച സംസ്ഥാനത്തെ മിക്കയിടങ്ങളിലും ഐഎന്‍ടിയുസിയുടെ നേതൃത്വത്തില്‍ സമരം നടന്നിരുന്നു. പ്രതിദിന ലൈസന്‍സുകളുടെ എണ്ണം നാല്‍പതിലും കൂട്ടണമെന്നതടക്കമുള്ള ആവശ്യങ്ങളാണ് സമരക്കാര്‍ മുന്നോട്ട് വയ്ക്കുന്നത്.നിലവിലെ പരിഷ്കാരത്തില്‍നിന്ന് പിന്നോട്ട് പോകാതെ സമരത്തില്‍നിന്ന് പിന്മാറില്ലെന്നാണ് സംഘടനകളുടെ നിലപാട്. അതേസമയം പൊലീസിന്‍റെ സഹായത്തോടെ പുതിയ പരിഷ്‌കാര പ്രകാരം തന്നെ ടെസ്റ്റ് നടത്താനാണ് മോട്ടോര്‍ വാഹന വകുപ്പിന്‍റെ നിര്‍ദേശം. മോട്ടോര്‍ വെഹിക്കിള്‍ ഡിപ്പാര്‍ട്ട് ഗസറ്റഡ് ഓഫീസേഴ്‌സ് അസോസിയേഷനും ഇക്കാര്യത്തില്‍ നിര്‍ദേശം പുറത്തിറക്കിയിട്ടുണ്ട്.
