വടകര: ചോറോട് കൈനാട്ടി മേല്‍പാലത്തിന് സമീപം യുവാവിനെ മരിച്ച നിലയില്‍ കണ്ടെത്തിയ സംഭവത്തില്‍ ഒരാള്‍ അറസ്റ്റില്‍. ഏറാമലയിലെ എടോത്ത് മീത്തല്‍ വിജീഷിനെ (33)ആണ് വടകര ഡിവൈഎസ്പി കെ.വിനോദ്കുമാര്‍ അറസ്റ്റ് ചെയ്തത്. പ്രതിയെ വടകര ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി 14 ദിവസത്തേക്ക് റിമാന്‍ഡ് ചെയ്തു.
വടകര താഴെ അങ്ങാടി വലിയവളപ്പ് കരകെട്ടി ചെറിയകണ്ടി ഫാസിലിന്‍റെ മരണവുമായി ബന്ധപ്പെട്ടാണ് വിജീഷ് അറസ്റ്റിലായത്. 2023 സെപ്റ്റംബര്‍ 13 ന് ബുധനാഴ്ച രാവിലെ ആറിന് ഫാസില്‍ കൈനാട്ടി മേല്‍പ്പാലത്തിന് സമീപമാണ് ഫാസിലിനെ മരിച്ച നിലയില്‍ കണ്ടെത്തിയത്.മരണത്തിന് അഞ്ച് ദിവസം മുമ്പാണ് ബഹ്‌റൈനില്‍ നിന്ന് ഇയാള്‍ നാട്ടിലെത്തിയത്. പ്രഭാത സവാരിക്കിറങ്ങിയവരാണ് മൃതദേഹം കണ്ടത്. തൊട്ടടുത്ത് ചോര പുരണ്ട നിലയില്‍ ഇയാളുടെ ആക്ടിവ സ്കൂട്ടറുമുണ്ടായിരുന്നു. മൂക്കില്‍ നിന്നും വായില്‍ നിന്നും ചെവിയില്‍ നിന്നും രക്തം പുറത്തേക്ക് ഒലിച്ചിറങ്ങിയ നിലയിലായിരുന്നു.
