കോട്ടയം: പാതിവഴിയില്‍ നിര്‍മാണം മുടങ്ങിയ ആകാശപ്പാതയുടെ തുടര്‍ നിര്‍മാണ പ്രവര്‍ത്തനങ്ങളു‌ടെ സാധ്യതകള്‍തേടി കളക്‌ടറുടെ നേതൃത്വത്തിലുള്ള വിദഗ്ധസംഘം പരിശോധന നടത്തി. നിലവില്‍ നാറ്റ് പാക്ക് തയാറാക്കിയിരിക്കുന്ന രൂപകല്പന പ്രകാരമുള്ള നിര്‍മാണ സാധ്യതകളാണ് ജില്ലാ കളക്ടര് വി. വിഗ്‌നേശ്വരിയുടെ നേതൃത്വത്തില്‍ കേരള റോഡ് സേഫ്റ്റി അഥോറിറ്റി, നാറ്റ്പാക്ക്, കിറ്റ്‌കോ, റവന്യു, മോട്ടോര്‍ വെഹിക്കിള്‍, പിഡബ്ല്യുഡി, പോലീസ് തുടങ്ങിയ വകുപ്പ് അധികൃതരുടെ നേതൃത്വത്തില്‍ പരിശോധിച്ചത്.നാറ്റ് പാക്ക് തയാറാക്കിയ രൂപകല്പന പ്രകാരം ആറു ലിഫ്റ്റുകളും മൂന്നു ഗോവണികളുമാണുള്ളത്. ഇവ നിര്‍മിക്കുമ്പോള്‍ നിലവിലുള്ള റോഡിന്‍റെ ഘടനയ്ക്ക് ഉണ്ടാകുന്ന മാറ്റമാണ് സംഘം പ്രധാനമായും വിലയിരുത്തിയത്.റവന്യു വകുപ്പിന്‍റെ പുറമ്പോക്ക് ഭൂമിയില്‍ ഉള്‍പ്പെടുന്ന തരത്തില്‍ നിര്‍മാണങ്ങള്‍ ഒതുങ്ങുമോ എന്നതും, അധികമായി സ്ഥലം വേണ്ടിവന്നാല്‍ അത് തിരക്കേറിയ റോഡിന്‍റെ ഗതാഗതത്തെ എങ്ങനെ ബാധിക്കുമെന്നതും സംഘം പരിഗണിക്കും.ആകാശപ്പാതയുടെ തുടര്‍ നിര്‍മാണ സാധ്യതകള്‍ ഹൈക്കോടതി ജില്ലാ ഭരണകൂടത്തോട് ആവശ്യപ്പെട്ടതിന്‍റെ അടിസ്ഥാനത്തിലാണ് പരിശോധന നടത്തിയതെന്ന് കളക്ടര് പറഞ്ഞു. സ്ഥല പരിശോധനയെത്തുടര്‍ന്ന് കോട്ടയം കളക്‌ടറേറ്റില്‍ ഉദ്യോഗസ്ഥരുടെ യോഗം ചേര്‍ന്ന് നടപടിക്രമങ്ങള്‍ വിലയിരുത്തി.തഹസില്‍ദാര്‍ യാസീന്‍ ഖാന്‍, കെആര്‍എസ്എ ഡയറക്ടര്‍മാരായ ലിജു അഴകേശന്‍, കല, നാറ്റ് പാക്ക് പ്രതിനിധി അരുണ്‍, മോട്ടോര്‍ വെഹിക്കിള്‍, പോലീസ് പ്രതിനിധികള്‍ തുടങ്ങിയവരും യോഗത്തില്‍ പങ്കെടുത്തു.റവന്യു വകുപ്പിന്‍റെ നേതൃത്വത്തില്‍ വീണ്ടും ഭൂമിപരിശോധന നടത്തിയശേഷം റിപ്പോര്‍ട്ട് കളക്‌ടര്‍ക്ക് സമര്‍പ്പിക്കും.
