തൃശൂർ: അതിരപ്പിള്ളിയിൽ കാട്ടാനകൾ റോഡിലിറങ്ങിയതിനു പിന്നാലെ നാട്ടുകാരുടെ പ്രതിഷേധം. കോൺഗ്രസിന്‍റെ നേതൃത്വത്തിൽ വഴിതടഞ്ഞ് പ്രതിഷേധിച്ചവരെ പോലീസ് അറസ്റ്റ് ചെയ്തു നീക്കി.രാവിലെ എട്ടോടെ ചാലക്കുടി-അതിരപ്പിള്ളി പാതയ്ക്കരികിലുള്ള എണ്ണപ്പനത്തോട്ടത്തിൽ കാട്ടാനക്കൂട്ടമെത്തിയിരുന്നു. തുടർന്ന് ഒമ്പതോടെ രണ്ട് ആനകൾ റോഡ് മുറിച്ചുകടക്കുകയായിരുന്നു. എസ്എസ്എൽസി പരീക്ഷയ്ക്കായി സ്കൂളിലേക്ക് പോകുന്ന കുട്ടികളുടെ വാഹനങ്ങളടക്കം റോഡിലുണ്ടായിരുന്നു. ഇതോടെ വനംവകുപ്പ് ഉദ്യോഗസ്ഥർ സ്ഥലത്തെത്തി.ആനകൾ വീണ്ടും എത്തിയതോടെ നാട്ടുകാർ പ്രതിഷേധവുമായി റോഡിലിറങ്ങി. അരമണിക്കൂറിലേറെ റോഡിൽ കുത്തിയിരുന്ന് മുദ്രാവാക്യം വിളിച്ച പ്രതിഷേധക്കാർ വിദ്യാർഥികളുടേതൊഴികെയുള്ള വാഹനങ്ങൾ തടഞ്ഞിടുകയും ചെയ്തു.
