വാടാനപ്പള്ളി: തളിക്കുളത്ത് ബസിൽ കൊണ്ടുപോയിരുന്ന എം.ഡി.എം.എ പൊലീസ് പിടികൂടി. ഒരാളെ അറസ്റ്റു ചെയ്തു. നീലഗിരി കൊന്നച്ചൽ എരുമോട് ചീരൻ വീട്ടിൽ സ്റ്റാലിൻ മാത്യുവിനെയാണ് (24) അറസ്റ്റ് ചെയ്തത്. 12.5 ഗ്രാം എം.ഡി.എം.എയാണ് തൃശൂർ റൂറൽ ഡാൻസാഫ് ടീമും വാടാനപ്പള്ളി പൊലീസും ചേർന്ന് പിടിച്ചെടുത്തത്.
തൃശൂർ റൂറൽ ജില്ല പൊലീസ് മേധാവി നവ്നീത് ശർമക്ക് ലഭിച്ച രഹസ്യവിവരത്തെ തുടർന്ന് പ്രത്യേക പൊലീസ് സംഘം തീരദേശ ഹൈവേയിൽ തളിക്കുളം ഹൈസ്കൂളിനടുത്ത് നടത്തിയ പരിശോധനയിലാണ് ബസിൽനിന്ന് പിടികൂടിയത്. കവറിൽ ഒളിപ്പിച്ച നിലയിലായിരുന്നു.