എരുമേലി :പൂഞ്ഞാർ നിയോജക മണ്ഡലത്തിലെ സർക്കാർ ആശുപത്രികളുടെ പ്രവർത്തനം പരിശോധിക്കാനും പൊതുജനങ്ങളിൽ നിന്ന് പരാതികൾ സ്വീകരിക്കാനും ആരോഗ്യ വകുപ്പ് മന്ത്രി യോഗം വിളിച്ചു ചേർക്കുമെന്ന് എംഎൽഎ സെബാസ്റ്റ്യൻ കുളത്തുങ്കൽ. ഇന്നലെ എരുമേലിയിൽ കാഞ്ഞിരപ്പള്ളി ബ്ലോക്കിലെ പഞ്ചായത്തുകളിലെ മഴക്കാല പൂർവ ശുചീകരണങ്ങളും രോഗ പ്രതിരോധ പ്രവർത്തനങ്ങളും വിലയിരുത്താൻ ആരോഗ്യ വകുപ്പ് വിളിച്ചു ചേർത്ത യോഗത്തിൽ സംസാരിക്കുകയായിരുന്നു എംഎൽഎ. പകർച്ചവ്യാധികളുടെ സ്ഥിതിവിവരകണക്കുകൾ, പ്രതിരോധ പ്രവർത്തനങ്ങൾ, മരുന്നുകളുടെ ലഭ്യത, ജീവനക്കാരുടെ കുറവ്, നിർമാണ പ്രവർത്തികളുടെ വിവരങ്ങൾ, ശബരിമല തീർത്ഥാടന മുന്നൊരുക്കം എന്നിവ യോഗത്തിൽ വിലയിരുത്തി. കാഞ്ഞിരപ്പള്ളി ബ്ലോക്ക്‌ പഞ്ചായത്ത്‌ പ്രസിഡന്റ് അജിത രതീഷ് അധ്യക്ഷയായിരുന്നു. ഡെപ്യൂട്ടി ജില്ലാ മെഡിക്കൽ ഓഫിസർ വിദ്യാധരൻ, ബ്ലോക്ക്‌ മെഡിക്കൽ ഓഫിസർ റെക്സൺ, എരുമേലി പഞ്ചായത്ത്‌ പ്രസിഡന്റ് ജിജിമോൾ സജി, അംഗം നാസർ പനച്ചി, എരുമേലി ഹെൽത്ത്‌ ഇൻസ്‌പെക്ടർ ഷാജി കറുകത്ര തുടങ്ങിയവർ പങ്കെടുത്തു.
