ജില്ലാ പഞ്ചായത്ത് സ്കൂളുകളിലെ നിർമ്മാണ പ്രവൃത്തികൾ 30 നകം പൂർത്തിയാക്കണം: ജില്ലാ പഞ്ചായത്ത് പ്രസിഡൻ്റ് എ മഹേന്ദ്രൻ

രണ്ടാംഘട്ട അവലോകനയോഗം ചേർന്നു

ആലപ്പുഴ ജില്ലാ പഞ്ചായത്തിന് കീഴിലുള്ള സ്കൂളുകളിൽ നിലവിൽ നടന്നുകൊണ്ടിരിക്കുന്ന എല്ലാ നിർമ്മാണ പ്രവൃത്തികളും ഈ മാസം 30 ഓടെ പൂർത്തിയാക്കണമെന്ന് ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ പറഞ്ഞു. പുതിയ അധ്യായന വര്‍ഷം ആരംഭിക്കുന്നതിന് മുന്നോടിയായി ആലപ്പുഴ ജില്ലാ പഞ്ചായത്തിന്റെ കീഴിലുള്ള 42 ഹൈസ്‌കൂള്‍, ഹയര്‍ സെക്കൻഡറി സ്‌കൂളുകൾ എന്നിവയുടെ ഒരുക്കങ്ങള്‍ പരിശോധിക്കുന്നതിന് ജില്ലാ പഞ്ചായത്ത് കോൺഫറൻസ് ഹാളിൽ ചേർന്ന രണ്ടാംഘട്ട അവലോകനയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 

അടിയന്തര അറ്റകുറ്റപ്പണികൾ ആവശ്യമുള്ള സ്‌കൂളുകളുടെ എസ്റ്റിമേറ്റ് ഉടൻ സമർപ്പിക്കണം. സ്‌കൂളുകളിൽ മതിലുകൾ നിർമ്മിക്കുന്നതിനും ഉപയോഗശൂന്യമായ ശൗചാലയങ്ങൾ പൊളിച്ചുമാറ്റി പുതിയവ നിർമ്മിക്കുന്നതിനും ആവശ്യമായ എസ്റ്റിമേറ്റുകൾ തയ്യാറാക്കാൻ അറിയിപ്പ് നൽകും. ലാപ്ടോപ്പുകൾ വിതരണം ചെയ്യുന്നതിനായി പൊതുവായ പ്രൊജക്ട് തയ്യാറാക്കും. എല്ലാ സ്‌കൂളുകളിലും ലാബ് സൗകര്യം ഉറപ്പാക്കാനുള്ള നടപടികൾ സ്വീകരിക്കുവാനും യോഗം തീരുമാനിച്ചു. സാമൂഹ്യവിരുദ്ധ ശല്യമുള്ള സ്കൂളുകളുടെ പട്ടിക പൊലീസിന് കൈമാറും. സിസിടിവി ആവശ്യമായ സ്കൂളുകൾ കണ്ടെത്തി അവ സ്ഥാപിക്കാൻ അനുമതി നൽകും. 

ഈ വര്‍ഷത്തെ ജില്ലാതല സ്കൂള്‍ പ്രവേശനോത്സവം വിപുലമായ രീതിയില്‍ ഗവ. ഡി.വി.എച്ച്.എസ്.എസ് ചാരമംഗലത്ത് നടത്താനും തീരുമാനിച്ചു. പ്രവേശനോത്സവത്തിന് മുന്നോടിയായി സ്കൂൾ തലത്തിൽ പ്രത്യേക യോഗങ്ങൾ ചേരും. തൊഴിലുറപ്പ് തൊഴിലാളികളെ ഉൾപ്പെടുത്തി സ്കൂൾ പരിസരങ്ങൾ ശുചീകരിക്കാനും ഇത് മൂന്നുമാസം കൂടുമ്പോൾ ആവർത്തിക്കാനും പദ്ധതി കൊണ്ടുവരും. പത്താം ക്ലാസ്സിലേക്ക് പ്രവേശനം നേടിയ വിദ്യാർഥികൾക്കും രക്ഷിതാക്കൾക്കുമായി അധ്യയന വർഷാരംഭത്തിൽ തന്നെ പ്രത്യേക ക്ലാസ്സുകൾ സംഘടിപ്പിക്കും. പിടിഎയുടെ പ്രവർത്തനങ്ങൾ ഏകോപിപ്പിക്കുന്നതിന് പിടിഎ പ്രസിഡന്റുമാരുടെ ജില്ലാതല യോഗം വിളിക്കുവാനും യോഗത്തിൽ തീരുമാനിച്ചു. 

പരിപാടിയിൽ ജില്ലാ പഞ്ചായത്ത് വൈസ് പ്രസിഡന്റ് അഡ്വ. ഷീന സനല്‍കുമാര്‍ അധ്യക്ഷയായി. സ്ഥിരംസമിതി അധ്യക്ഷരായ എസ് രാധാകൃഷ്ണന്‍, ആര്‍ രാഹുല്‍, ഡി അംബുജാക്ഷി ടീച്ചര്‍, സന്ധ്യാ ബെന്നി, ജില്ലാപഞ്ചയത്ത് സെക്രട്ടറി വി പ്രദീപ്, മറ്റ് ജില്ലാ പഞ്ചായത്തംഗങ്ങൾ, പൊതുമരാമത്ത് വിഭാഗം ഉദ്യോഗസ്ഥർ, സ്‌കൂള്‍ പ്രഥമാധ്യാപകർ, പ്രിന്‍സിപ്പൽമാര്‍, എഞ്ചിനീയർമാർ തുടങ്ങിയവര്‍ പങ്കെടുത്തു.