കോട്ടയം: ബിജെപി സംസ്ഥാന വ്യാപകമായി നടത്തിവരുന്ന വികസിത കേരളം കണ്‍വന്‍ഷന്‍ ഇന്നു ജില്ലയില്‍ നടക്കും. ‘മാറാത്തത് മാറും’ എന്ന മുദ്രാവാക്യമുയര്‍ത്തി നടക്കുന്ന വികസിത കേരളം കോട്ടയം ഈസ്റ്റ് ജില്ലാ കണ്‍വന്‍ഷന്‍ രാവിലെ 10ന് കറുകച്ചാല്‍ ശ്രീനികേതന്‍ ഓഡിറ്റോറിയത്തിലും വെസ്റ്റ് ജില്ലാ കണ്‍വന്‍ഷന്‍ വൈകുന്നേരം നാലിനു കോട്ടയം കെപിഎസ് മേനോന്‍ ഹാളിലും നടക്കും. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ രണ്ടു സമ്മേളനങ്ങളും ഉദ്ഘാടനം ചെയ്യും. കേന്ദ്ര സഹമന്ത്രി ജോര്‍ജ് കുര്യന്‍ മുഖ്യപ്രഭാഷണം നടത്തും. സംസ്ഥാന, ജില്ലാ നേതാക്കള്‍ യോഗങ്ങളില്‍ പങ്കെടുക്കും.
സംസ്ഥാന അധ്യക്ഷനായശേഷം ആദ്യമായി ജില്ലയില്‍ എത്തുന്ന രാജീവ് ചന്ദ്രശേഖറിനെ സ്വീകരിക്കാന്‍ വലിയ ഒരുക്കങ്ങളാണ് ഏര്‍പ്പെടുത്തിയിരിക്കുന്നതെന്ന് വെസ്റ്റ് ജില്ലാ അധ്യക്ഷന്‍ ലിജിന്‍ ലാല്‍ പറഞ്ഞു. തദ്ദേശ തെരഞ്ഞെടുപ്പ് പ്രവര്‍ത്തനങ്ങള്‍ കൂടുതല്‍ ഊര്‍ജിതമാക്കുന്നതിന്‍റെ ഭാഗമായി ജില്ലാ, മണ്ഡലം ഭാരവാഹികള്‍ക്കൊപ്പം തദ്ദേശ തെരഞ്ഞെടുപ്പിന്‍റെ പാര്‍ട്ടി ചുമതലക്കാരും പ്രവര്‍ത്തകരും കണ്‍വന്‍ഷനില്‍ പങ്കെടുക്കും.
