കരുതലും കൈത്താങ്ങും പരാതിപരിഹാര അദാലത്തിന് കോട്ടയം ജില്ലയിൽ സമാപനം

അദാലത്തിലൂടെ ആശ്വാസതീരമണഞ്ഞ് 537 കുടുംബങ്ങൾ – 537 പരാതികൾ ഉടനടി പരിഹരിച്ചു– ജില്ലയിൽ മൊത്തം ലഭിച്ചത് 1675 അപേക്ഷ- 1185 അപേക്ഷകൾ 15 ദിവസത്തിനകം തീർപ്പാക്കും കോട്ടയം: മന്ത്രിമാർ താലൂക്ക്തലത്തിൽ ജനങ്ങളുടെ അരികിലെത്തി പരാതികൾ കേട്ട്
ഉടനടി പരിഹാരനടപടി കൈക്കൊള്ളുന്ന കരുതലും കൈത്താങ്ങും പരാതിപരിഹാര
അദാലത്തിന് കോട്ടയം ജില്ലയിൽ സമാപനം. 537 കുടുംബങ്ങൾക്ക് ആശ്വാസമേകിയാണ്
അഞ്ചുദിവസങ്ങളിലായി നടന്ന അദാലത്ത് സമാപിച്ചത്. അഞ്ചു താലൂക്കുകളിലായി
നടന്ന അദാലത്തിൽ സഹകരണ-തുറമുഖ-ദേവസ്വം വകുപ്പു മന്ത്രി വി.എൻ. വാസവനും
ജലസേചന വകുപ്പു മന്ത്രി റോഷി അഗസ്റ്റിനും മുഴുവൻ സമയവും പങ്കെടുത്ത്
പരാതിക്കാരെയും അപേക്ഷകരെയും കേട്ടു. ജില്ലയിൽ മൊത്തം 1675 അപേക്ഷകളാണ്
ലഭിച്ചത്. ഇതിൽ 537 എണ്ണത്തിന് അദാലത്തിൽവച്ചു തന്നെ പരിഹാരമുണ്ടാക്കി.
1138 അപേക്ഷകൾ 15 ദിവസത്തിനകം തീർപ്പാക്കി അപേക്ഷകരെ രേഖാമൂലം
അറിയിക്കുന്നതിന് വിവിധ വകുപ്പുകൾക്ക് നിർദ്ദേശം നൽകി. ഓൺലൈനായി അപേക്ഷകൾ
വിവിധ വകുപ്പുകൾക്ക് കൈമാറിയിട്ടുണ്ട്. അടിയന്തരമായി പരാതികൾ പരിഗണിച്ച്
തീർപ്പാക്കാനാണ് സർക്കാർ വിവിധ വകുപ്പുകളുടെ ജില്ലാതല മേധാവികൾക്ക്
നിർദ്ദേശം നൽകിയിട്ടുള്ളത്. കാഞ്ഞിരപ്പള്ളി താലൂക്കിൽ ചൊവ്വാഴ്ച നടന്ന
അദാലത്തിൽ മൊത്തം 288 പരാതികളാണ് ലഭിച്ചത്്. ഇതിൽ 138 അപേക്ഷകൾ ഉടൻ
തീർപ്പാക്കി. മറ്റു പരാതികൾ 15 ദിവസത്തിനകം തീർപ്പാക്കി അപേക്ഷകനെ
അറിയിക്കും. സാമൂഹിക ക്ഷേമ പെൻഷൻ അനുവദിക്കൽ, അപകടകരമായ മരങ്ങൾ മുറിക്കൽ,
മുൻഗണന റേഷൻ കാർഡ് അനുവദിക്കൽ, സർവേ, വീടുകൾക്ക് സംരക്ഷണം ഒരുക്കൽ,
ഭൂമിസംബന്ധമായ പരാതികൾ തുടങ്ങി വിവിധ വിഷയങ്ങളിലുള്ള പരാതികൾ അദാലത്തിലൂടെ
തീർപ്പാക്കി. എല്ലാ വകുപ്പുകളുടെയും ജില്ലാതല ഉദ്യോഗസ്ഥരും പരാതികളുമായി
ബന്ധപ്പെട്ട വിവിധ വകുപ്പ് ഉദ്യോഗസ്ഥരും അദാലത്തിൽ സന്നിഹിതരായി. ജില്ലാ
കളക്ടർ ജോൺ വി. സാമുവലിന്റെ നേതൃത്വത്തിൽ വിപുലമായ സംവിധാനങ്ങളാണ്
അദാലത്തിനായി ഒരുക്കിയിരുന്നത്. ദീർഘകാലമായി ചുവപ്പുനാടയിൽ
കുടുങ്ങിക്കിടന്ന പല പരാതികൾക്കും പരിഹാരവേദിയായി അദാലത്ത്.  ഫോട്ടോകാപ്ഷൻകാഞ്ഞിരപ്പള്ളി താലൂക്കിൽ നടന്ന കരുതലും കൈത്താങ്ങും പരാതിപരിഹാര അദാലത്തിൽ മന്ത്രി വി.എൻ. വാസവൻ പരാതികൾ കേൾക്കുന്നു.കാഞ്ഞിരപ്പള്ളി താലൂക്കിൽ നടന്ന കരുതലും കൈത്താങ്ങും പരാതിപരിഹാര അദാലത്തിൽ മന്ത്രി റോഷി അഗസ്റ്റിൻ പരാതികൾ കേൾക്കുന്നു. അഖിലിന്റെ സ്വപ്‌നം പൂവണിയും;അരികെയുണ്ട് സർക്കാർ കോട്ടയം:
തന്റെ വർഷങ്ങളായുള്ള സ്വപ്‌നം പൂവണിയുന്ന സന്തോഷത്തിലായിരുന്നു കെ.ആർ.
അഖിൽ. ദ്വിവത്സര കമ്പ്യൂട്ടർ കോഴ്‌സ് വിദ്യാർഥിയായ പൊന്തൻപുഴ മുക്കട
കുളക്കുറ്റിയിൽ കെ.ആർ. അഖിൽ പഠനാവശ്യത്തിന് ലാപ്‌ടോപ്പ് അനുവദിക്കണമെന്ന
ആവശ്യവുമായാണ് കാഞ്ഞിരപ്പള്ളി താലൂക്കിൽ നടന്ന കരുതലും കൈത്താങ്ങും
പരാതിപരിഹാര അദാലത്തിലെത്തിയത്. ഭിന്നശേഷിക്കാരനായ അഖിലിന്റെ പരാതി
പരിഗണിച്ച മന്ത്രി വി.എൻ. വാസവൻ പട്ടികജാതി വിദ്യാർഥികളുടെ ഉന്നമനത്തിനായി
പ്രത്യേകപദ്ധതി റിവിഷനിലൂടെ നടപ്പാക്കി ലാപ്‌ടോപ്പ് അനുവദിക്കാൻ മണിമല
പഞ്ചായത്ത് സെക്രട്ടറിക്കും തദ്ദേശസ്വയംഭരണ വകുപ്പ് ജോയിന്റ് ഡയറക്ടർക്കും
നിർദ്ദേശം നൽകി. ”അച്ഛൻ ഹൃദ്രോഗിയാണ്. ലാപ്‌ടോപ്പ് വാങ്ങാൻ മറ്റു
മാർഗങ്ങൾ തെളിയാതെ വന്നപ്പോഴാണ് അദാലത്തിലെത്തിയത്. ലാപ്‌ടോപ്പ്
അനുവദിക്കാൻ പഞ്ചായത്തിന് മന്ത്രി നിർദ്ദേശം നൽകി. ലാപ്‌ടോപ്പ് ഉറപ്പായും
നൽകുമെന്ന് മന്ത്രി വാക്കുനൽകിയിട്ടുണ്ട്. അതു ലഭിക്കും, വിശ്വാസമുണ്ട്. വലിയ സന്തോഷമുണ്ട്”- അഖിൽ പറഞ്ഞു.ഫോട്ടോകാപ്ഷൻ ലാപ്‌ടോപ്പ് അനുവദിക്കുമെന്ന വിവരം മന്ത്രി വി.എൻ. വാസവൻ കെ.ആർ. അഖിലിനെ അറിയിച്ചപ്പോൾ.