വയനാട്ടിൽ ഹർത്താൽ തുടങ്ങി ; ദീർഘദൂര സർവീസുകൾ നടത്തുമെന്ന് കെ.എസ്.ആർ.ടി.സി

November 19, 2024

കല്‍പറ്റ : മുണ്ടക്കൈ ഉരുള്‍പൊട്ടല്‍ ദേശീയ ദുരന്തമായി പ്രഖ്യാപിക്കാത്തതിലും സാമ്പത്തിക സഹായം അനുവദിക്കാത്തതിലും പ്രതിഷേധിച്ച് വയനാട്ടിൽ പ്രഖ്യാപിച്ച ഹർത്താൽ തുടങ്ങി. യു.ഡി.എഫും എൽ.ഡി.എഫുമാണ് ഹര്‍ത്താലിന് ആഹ്വാനം ചെയ്തത്.

വൈകുന്നേരം ആറു വരെ നടത്തുന്ന ഹർത്താലിന് വിവിധ സംഘടനകളുടെയും പിന്തുണയുണ്ട്. ദുരന്തത്തിന്റെ അതിജീവിതരുടെ കൂട്ടായ്മയായ ജനകീയ സമിതിയും ഹർത്താലിനെ പിന്തുണക്കും. കടകൾ തുറക്കില്ല.രാവിലെ കൽപറ്റ, മാനന്തവാടി, സുൽത്താൻ ബത്തേരി മേഖലകളിലെ പോസ്റ്റ് ഓഫീസിലേക്ക് യു.ഡി.എഫിന്‍റെ മാർച്ചും കൽപറ്റയിലടക്കം എൽ.ഡി.എഫിന്‍റെ പ്രതിഷേധ പ്രകടനവും നടക്കും.അതേസമയം, ലക്കിടിയിൽ ഹർത്താൽ അനുകൂലികൾ വാഹനങ്ങൾ തടഞ്ഞു. പൊലീസ് ഇടപെട്ട് വാഹനങ്ങൾ കടത്തിവിടുന്നുണ്ട്.

പുലർച്ച വയനാട് ചുരം ഇറങ്ങുന്ന ബസുകൾ ഒഴികെ ഓടില്ലെന്നും പിന്നീട് വൈകുന്നേരം ആറിനു ശേഷം മാത്രമേ ബസുകൾ ഓടൂവെന്നും എന്നാൽ, ദീർഘദൂര സർവീസുകൾ നടത്തുമെന്നും കെ.എസ്.ആർ.ടി.സി അധികൃതർ അറിയിച്ചു.

തെരഞ്ഞെടുപ്പ് ഔദ്യോഗിക വാഹനങ്ങൾ, ഉദ്യോഗസ്ഥർ, ശബരിമല തീർഥാടകർ, ആശുപത്രിയുമായി ബന്ധപ്പെട്ട കാര്യങ്ങൾ, പാൽ, പത്രം, വിവാഹ സംബന്ധമായ യാത്രകൾ തുടങ്ങിയവയെ ഹർത്താലിൽ നിന്ന് ഒഴിവാക്കിയതായി യു.ഡി.എഫ് ജില്ല ചെയർമാൻ കെ.കെ. അഹമ്മദ് ഹാജി, കൺവീനർ പി.ടി. ഗോപാലക്കുറുപ്പ് എന്നിവർ അറിയിച്ചു.