ന്യൂഡൽഹി:
ആരോഗ്യപ്രശ്നങ്ങളെ തുടർന്ന് ഉപരാഷ്ട്രപതി ജഗ്ദീപ് ധൻകർ
രാജിവച്ചു. ആരോഗ്യ സംരക്ഷണത്തിന് മുൻഗണന
നൽകുകയാണെന്നും ഭരണഘടനയുടെ ആർട്ടിക്കിൾ 67(എ)
അനുസരിച്ചാണ് രാജിവയ്ക്കുന്നതെന്ന് രാഷ്ട്രപതി ദ്രൗപദി
മുർമുവിന് അയച്ച കത്തിൽ പറയുന്നു. പ്രധാനമന്ത്രി
നരേന്ദ്ര മോദി, കേന്ദ്രമന്ത്രിമാർ തുടങ്ങിയവരോ‌ട് തനിക്ക്
നന്ദിയുണ്ടെന്നും അദ്ദേഹത്തിന്‍റെ കത്തിൽ പറയുന്നു.
പ്രധാനമന്ത്രിയുടെ പിന്തുണ വിലമതിക്കാനാകാത്തതാണെന്നും
അദ്ദേഹത്തില്‍നിന്ന് ഒരുപാട് കാര്യങ്ങള്‍
പഠിക്കാനായെന്നും സാമൂഹികമാധ്യമത്തില്‍ പങ്കുവെച്ച
രാജിക്കത്തില്‍ അദ്ദേഹം പറഞ്ഞു. കാലാവധി തീരാൻ
രണ്ടുവർഷമുള്ളപ്പോഴാണ് അപ്രതീക്ഷിത
പ്രഖ്യാപനമുണ്ടായത്. 2022 ഓഗസ്റ്റിലാണ് ജഗ്ദീപ് ധന്‍കര്‍
ചുമതലയേറ്റത്. രാജസ്ഥാനിലെ ജുന്‍ജുനു സ്വദേശിയായ
ജഗ്ദീപ് ധന്‍കര്‍ മുന്‍ കേന്ദ്രമന്ത്രിയും ബംഗാള്‍ മുന്‍
ഗവര്‍ണറുമായിരുന്നു. ആരോഗ്യ കാരണങ്ങളാൽ കഴിഞ്ഞ
മാർച്ച് മാസം മുതൽ അദ്ദേഹം ആശുപത്രിയിലായിരുന്നു. ഈ
മാസമാണ് അദ്ദേഹം ചുമതലയിൽ തിരികെയെത്തിയത്. ഇന്നും
അദ്ദേഹം പാർലമെന്‍റിൽ എത്തിയിരുന്നു.
